वस्त्रनगरी वृत्तसेवा / विक्रम खांडेकर
इचलकरंजी : गणपती बाप्पा मोरया,पुढच्या वर्षी लवकर या… च्या जयघोषात इचलकरंजीत मोठ्या उत्साहात गणेश विसर्जन मिरवणुकीस सुरुवात झाली.बिरदेव वाचनालय या मानाच्या गणेश मूर्तीच्या आरतीने मिरवणुकीस सुरुवात झाली.
उत्साहाचे आणि श्रद्धेने संपूर्ण वातावरण गेली अकरा दिवस चैतन्य मय झाले होते.गणपती बाप्पाच्या दर्शनासाठी शुक्रवारी शहरात भाविकांचा महापूर उसळला होता. प्रमुख मंडळांनी केलेले आकर्षक डेकोरेशन व देखावे लोकांच्या आकर्षणाचे केंद्रबिंदू ठरत होते.आज शहर वाहतूक शाखे जवळ मानाच्या गणेश मूर्तीच्या पूजनाने मिरवणुकीस सुरुवात झाली.खासदार धैर्यशील माने, जिल्हाधिकारी अमोल येडगे,पोलिस अधीक्षक योगेशकुमार गुप्ता.आयुक्त पल्लवी पाटील,आमदार राहुल आवाडे,प्रांताधिकारी दीपक शिंदे, अपर पोलीस अधीक्षक अण्णासाहेब जाधव,पोलिस उपअधीक्षक विक्रांत गायकवाड,माजी आमदार प्रकाश आवाडे,अपर तहसीलदार महेश खिलारी आदींच्या उपस्थितीत आरती करण्यात आली.आरती नंतर स्वागत व्यासपीठाचे उद्घाटन करण्यात आले तसेच पंचगंगा नदी आणि शहापूर खण येथे अधिकाऱ्यांनी भेटी देऊन विसर्जन संदर्भात प्रशासनाने केलेल्या व्यवस्थेची पाहणी करण्यात आली.सागर चाळके,शशांक बावचकर,रवी रजपुते,रवींद्र माने,सुहास जांभळे,शशिकला बोरा,अरुणा शहा आदी उपस्थित होते.
धनगरी ढोलणे वातावरण चैतन्यमय : परंपरे प्रमाणे धनगरी ढोल वाजवण्यात आले त्यामुळे विसर्जन मिरवणुकीत चैतन्य आले.खासदार धैर्यशील माने, जिल्हाधिकारी अमोल येडगे,पोलिस अधीक्षक योगेशकुमार गुप्ता,आमदार राहुल आवाडे यांनीही गळ्यात ढोल घालून ढोल वाजवण्याचा आनंद लुटला.
मंगलमय लाईव्ह आरती : या वर्षी प्रथमच प्रशांत होगाडे आणि नीता ठाकूर देसाई यांच्या नेतृत्वाखाली मंगलमय लाईव्ह आरती म्हणण्यात आली.त्यामुळे संपूर्ण वातावरण भक्तिमय झाले.बाप्पाच्या आरतीत लीन झाले. लाईव्ह आरती साठी स्वतंत्र व्यासपीठ उभारण्यात आले होते.
शिवाजी नगर पोलिस ठाण्याचा एक गणवेश : शिवाजी नगर पोलिस ठाण्याचा गणपतीही पालखीतून आणण्यात आला.त्यावेळी पुरुष व महिला दोन्ही कर्मचाऱ्यांनी एक रंगाचा कुर्ता पायजमा परिधान करून विसर्जन मिरवणुकीत सहभाग घेतला.अनेक मंडळातील महिला व पुरुष सदस्यांनी एक सारखा ड्रेस परिधान करून मिरवणुकीत सहभाग घेतला.अनेकांचे ड्रेस लक्षवेधी होते.
इयर बडस चे वाटप : डॉल्बी मुळे नागरिकांच्या कानाला दुखापत होते. काहींना कायमस्वरूपी बहिरापणा येऊ शकतो याची गांभीर्य असलेल्या मेडिकल असोसिएशन ऑफ इचलकरंजी यांच्याकडून नागरिकांना इयर बडस चे वाटप करण्यात आले.पत्रकारांनाही त्यांनी इयर बडस दिले.
आयुक्तांच्या गणरायाचे पर्यावरण पूरक विसर्जन : आयुक्त पल्लवी पाटील यांनी शहरातील नागरिकांना पर्यावरण पूरक गणेश मूर्तीची प्रतिष्ठापना आणि विसर्जन करण्याचे आवाहन केले होते. त्याला प्रतिसाद देत 15000 हून अधिक नागरिकांनी पर्यावरण पूरक गणेश मूर्तीचे विसर्जन केले होते. आयुक्त पल्लवी पाटील यांनीही आपल्या घरामध्ये पर्यावरण पूरक गणेश मूर्तीची प्रतिष्ठापना केली होती.त्यांनी आपल्या घरी उभारलेल्या कुंडामध्येच पर्यावरण पूरक गणेश मूर्तीचे विसर्जन केले.याचे कौतुक होत आहे.
